منموهن سينگ یو تکړه هندى اقتصاد پوه، او سياستوال و، چى په کال 1932 ميلادي کى د پنجاب په چکوال يا (اوسني پاکستان) کې زيږيدلى و. هغه په کال 1991 ميلادي کى د هند د ماليى وزير او وروسته په 2004 ميلادي کال کى د هند د لومړي وزیر په توګه دنده ترسره کړې.

ډاکټر سنګ د خپل علم په مرسته په هند کى يو ستر اقتصادي انقلاب راوست چى د خپل اقتصادي علم په واسطه يې هند له يو لوى اقتصادي ناورين څخه وژغوره.

په 1991 ميلادي کال کى، کله چى سنګ تازه د ماليې وزير وټاکل شو، هند د يو سخت اقتصادي ناورين شاهد وو، هغه مهال د هند د بهرنیو اسعارو زيرمه دومره کمه وه چى يوازې د دوو اونيو د وارداتو لپاره يى هم بسنه نه کوله.

په همدې کړکېچن حالت کې ډاکټر سنګ د نوى کلنۍ بودیجې په وړاندې کولو سره د نوو اقتصادي پاليسيو پر مټ د هند اقتصاد ته نوى ساه ورکړه، د هغه د نويو پاليسيو په عملي کولو سره په هند کى يو اقتصادي بدلون راغى چى په دى سره يى هند د نړۍ د سترو اقتصادونو په قطار کى راوست.

ډاکټر سنګ د خپلى پوهى پر بنسټ د اقتصادي ناورين له مينځه وړلو لپاره د کاروبارونو د جواز ختمولو، د بهرنيو مستقيمو پانګونو جلبولو، د سوداګرۍ د محدوديتونو لرې کولو او څو ورته نورو پاليسيو په عملي کولو سره د هند اقتصادي اړخ په مکمله توګه بدل کړ.

اوس افغانستان څه کولى شي تر څو د هند په څير، له شته اقتصادي ستونزو څخه ځان وژغوري؟

افغانستان کولی شي د شته اقتصادي ستونزو څخه د خلاصون لپاره له خپلو طبيعي زيرمو لکه د معدني زيرمو او زراعتي محصولاتو څخه په اغيزمنه توګه ګټه پورته کړي. او سربېره پر دى، بهرني پانګوال وهڅوي تر څو په افغانستان کې پانګونه وکړي، او په کور دننه د کورني محصولاتو د ډيرولو لپاره اساسي پلانونه په کار واچول شي، له بهرنیو پرمختللو هيوادونو سره د زراعتي محصولاتو اړوند ټکنالوژيو په واردولو سره هوکړه ليکونه لاسلیک شي، او ددى تر څنګ بهرني او کورني پانګوال د پروسس کولو نوو کارخونو جوړولو ته وهڅوي، چى دا به د هيواد ډيرى وګړو ته د کار زمينه برابره کړي، او د صادراتو لپاره له بهرنيو هيوادونو سره د صادراتو تعارفو په کمولو او يا معافولو توافق وشي، چى په پاى کى به د هيواد د صادراتو کچه په بى سارى توګه لوړه شي.