09 Aug,25
x
ډېر پلټل شوي
09 Aug
افغانستان کى د زعفرانو حاصلاتو د زياتوالي لاملونه څه دي او څنګه افغانستان له دى حاصلاتو په ښه توګه ګټه اخيستى شي.
لیکوال: کامران نوري
په افغانستان کې د زعفرانو د تولید په برخه کې د پام وړ زياتوالى راغلى دى. د کرنې وزارت د معلوماتو له مخې، سږکال د زعفرانو حاصلات د تېر کال په پرتله زیات شوي چې لامل يي د بارانونو زیاتوالی، د کرنې نوې کړنلارې، او کروندګرو ته د زعفرانو د نویو بوټو وېش د دې پرمختګ عمده عوامل بلل کېږي. د دې پرمختګ اصلي محور هرات ولایت دی چې د هېواد د ۹۰ سلنه زعفرانو تولید مسؤلیت لري.
د زعفرانو حاصلات نه یوازې د کروندګرو لپاره اقتصادي ګټه لري، بلکې د نړیوالو بازارونو لپاره د افغانستان یو مهم صادراتي محصول هم ګڼل کېږي. سربېره پردى، ځينى ننګونې شتون لري لکه نړیوال بازار ته په کمه کچه لاسرسى، د ټرانسپورټي خدماتو کمښت، او د نړیوالو ملاتړ کوونکو شرکتونو د کمرنګه ونډې له امله، لا هم کروندګر له ګڼو اقتصادي ستونزو سره مخ دي. د دې ننګونو د حل لپاره د هېواد اوسني حاکمانو ته دا اړینه ده چې د زعفرانو د صنعت په برخه کې اوږدمهاله پلانونو باندى کار وکړي.
د زعفرانو د تولید، پروسس، او نړیوالو بازارونو ته د صادراتو لپاره د یو منظم او ملي پلان جوړونه اړینه ده. د دې ترڅنګ، د زعفرانو لپاره د برانډ جوړونې، د نړیوالو کیفیت معیارونو پوره کولو، او د بهرنیو پانګوالو جلب لپاره مشخصې تګلارې لازمى ګڼل کېږي.
د افغانستان د زعفرانو صنعت په نړیوالو بازارونو کې د ځانګړي شهرت درلودونکی دی، که په دې برخه کې نړيوال ملاتړ ترلاسه شي، دا صنعت کولی شي د هېواد اقتصاد په رغولو کې رغنده رول ولوبوي، او ددى لپاره تر ټولو اړینه دا ده چې د تخمونو او وسایلو په برخه کې ملاتړ ته دوام ورکړل شي، نړیوالو بازارونو ته د لاسرسي لپاره د ټرانسپورټي اسانتیاوو برابرولو ته پام وشي، او د زعفرانو د پروسس او بسته بندۍ لپاره معیاري کارخونې جوړى شي.