افغانستان د روان کال په وروستیو میاشتو کې د نړیوالو نندارتونونو له لارې د خپلو صادراتي محصولاتو د پراختیا لپاره لوی ګامونه پورته کوي. د اکټوبر له ۱۹مې تر ۲۲مې به د افغان-قزاق نندارتون د قزاقستان په الماتا ښار کې جوړ شي، چې پکې به د افغانستان ۶۹ شرکتونه په ۸۰ غرفو کې د خپلو تولیداتو لکه غالۍ، وچه مېوه، زعفران، قیمتي او نیمه قیمتي ډبرې نندارې ته وړاندې کړي. په دې نندارتون کې د صنعت او سوداګرۍ وزارت د سرپرست په مشرۍ یو پلاوی او ۲۵۰ افغان سوداګر ګډون کوي. دا د منځنۍ آسیا هېوادونو ته د صادراتو د زیاتوالي لپاره یو مهم فرصت ګڼل کېږي، ځکه اوس مهال د افغانستان د کال صادرات منځنۍ آسيا ته کابو سل میلیونه ډالره دي، په داسې حال کې چې د وارداتو کچه ډېره لوړه ده.

بله مهمه موقع به د نومبر له ۲۷مې تر ۳۰مې په استانبول کې د «حلال استانبول» نړیوال نندارتون وي، چې د نړۍ درېیم ستر نندارتون بلل کېږي. په دې نندارتون کې به د افغانستان د صادراتي محصولاتو لکه وچه او تازه مېوه، طبي بوټي، غالۍ، لاسي صنایع او نور تولیدات نندارې ته وړاندې شي. دا نندارتون د افغانستان لپاره یو مهم فرصت دی ترڅو خپل تولیدات نړیوالو بازارونو ته، په ځانګړي ډول د اروپا بازارونو ته معرفي کړي.

د ۲۰۲۵ کال د جنورۍپه ۷ مه د غالیو ځانګړی نندارتون هم په ترکیه کې جوړېږي، چې افغان غالۍ جوړونکي به پکې ګډون وکړي. د ترکۍ د غالیو اتحادیه هم د افغاني غالیو د سکتور ګډون ته ډېره لیواله ده.

د دې نندارتونونو له لارې، افغانستان کولی شي د خپلو کورنیو تولیداتو د پلور لپاره نوي بازارونه رامنځته کړي، او د سوداګرۍ په برخه کې د سیمه‌ییزو او نړیوالو اړیکو د پراختیا لپاره مهم ګامونه پورته کړي. تېرې اوونۍ کابل کې د امام ابوحنیفه درېیم نندارتون جوړ شو، چې په کې کورني او بهرني سوداګرو په ۷۰۰ غرفو کې خپل محصولات نندارې ته وړاندې کړل. دا نندارتونونه د افغانستان د سوداګرۍ د پراختیا او د داخلي تولیداتو د نړیوالو بازارونو ته د معرفي کولو لپاره د پام وړ هڅې ښیي، او تمه کېږي چې افغانستان نوي بازارونه ومومې او په نړیوالو سوداګریزو اړیکو کې خپل رول زیات کړي.