افغانستان د لمریزې بريښنا د پراختیا لپاره ډېر لمريز سهولتونه لري، خو د دې سهولتونو د لا ښه کارولو لپاره، د استرالیا د بامي لمریزې بريښنا سیستم له تجربې څخه الهام اخیستل یو مهم ګام ګڼل کېږي. استرالیا په دې وروستیو کې د بامي لمریزې برېښنا له لارې د خپلې برېښنا اړتیا له ۵۰٪ سلنې ډېره برخه پوره کړې. د دې تجربې په رڼا کې، افغانستان هم باید د بامي لمریزې بريښنا سیستمونو ته توجو وکړي، ترڅو د انرژۍ د پراختیا، د کورنیو د برېښنا لګښت کمولو او د چاپېریال ساتنې په برخه کې ترې ګټه پورته کړي.

د بامي لمریزې بريښنا د سیستم ګټې:

۱. د برېښنا د لګښت کمول: د بامي لمریزې بريښنا سیستم د کورونو او کاروبارونو/شرکتونو لپاره د برېښنا لګښتونه راکموي، چې د کورنيو اقتصادي وضعیت ته پروه ګټور تمامېدلی شي.

۲. د انرژۍ ځان‌ بسیاينه: د بامي لمریزې بريښنا سیستم له لارې افغانستان کولی شي د وارداتي برېښنا پر ځای خپله برېښنا تولید کړي او پر بهرنیو هيوادونو تکیه راکمه کړي.

۳. چاپېریال ساتنه: د لمریزې برېښنا د کارولو له لارې د ګلخانه اي ګازونو/ کاربونډای اکسایډ اخراج کمېږي، چې د چاپېریال پاکوالي او د هوا ښه والي لپاره ګټور دي.

د افغانستان لپاره پر بامي لمريزې بريښنا د عمل وړ لارښوونې:

- د بامي لمریزې بريښنا سیستمونو لپاره د حکومتي سبسایډۍ رامنځته کول: د کورونو او سوداګریزو ځایونو لپاره د لمریز سیستم د نصبولو لپاره د مالیې معافیتونه او سبسیډي برابرول.

- عامه پوهاوی او ښوونه: د بامي لمریزې بريښنا سیستم د ګټو په اړه د خلکو د پوهېدو لپاره د عامه پوهاوي پروګرامونو پیلول.

- شبکې ته د اضافي برېښنا ليږد او پلور: د هغو کسانو لپاره چې د بامي لمريزې بريښنا سیستمونه لګوي، د اضافي تولید شوې برېښنا د شبکې سره د نښلولو او پلورلو اسانتیاوې برابرول.

- د مالي ملاتړ پروګرامونه: د بامي لمریزې بريښنا سیستم د نصبولو لپاره د کوچنيو پورونو او مرستو برابرول، ترڅو خلک وهڅول شي چې لمریزه برېښنا وکاروي.

افغانستان د لمریزې انرژۍ د کارولو له لارې کولی شي د انرژۍ اړتیاوې پوره کړي او د چاپېریال ساتنې او اقتصادي پراختیا پر لور ګام پورته کړي. د استرالیا د بام لمریز تجربې څخه الهام اخیستل او د نغلو پروژې په څېر مهمې پروژې پيلول د هیواد د انرژۍ او پر ځان بسياینې لپاره یوه غوره او ارزښتناکه لاره ګڼل کېږي.