په روان مالي کال کې د افغانۍ ارزښت د نورو اسعارو پر وړاندې د پام وړ لوړوالی ښودلی دی، چې د افغانستان بانک لخوا د پولي سیاستونو د تطبیق پایله ګڼل شوې ده. د تیر کال د لړم میاشتې په پرتله، سږ کال د افغانۍ ارزښت د یو شمېر مهمو نړیوالو اسعارو په وړاندې زیات شوی دی.

د وروستیو شمېرنو له مخې، افغانۍ د ایراني ریال پر وړاندې ۲۶.۱۹ سلنه، د ترکي لېرې پر وړاندې ۱۸.۳۴ سلنه، د یورو پر وړاندې ۵.۰۴ سلنه، د امریکایي ډالر پر وړاندې ۲.۰۵ سلنه، د پاکستانۍ روپۍ پر وړاندې ۲.۰۹ سلنه او د هندۍ روپۍ پر وړاندې ۱.۳۲ سلنه لوړه شوې ده. دغه پرمختګ د افغانستان په مالي او اقتصادي نظام کې د پياوړتیا یوه نښه بلل کېږي.

افغانستان بانک د پولي سیاستونو اغېزمنه پلي کول د افغانۍ د ارزښت د لوړېدو مهم عامل ګڼلي دي. ياد بانک هڅه کړې چې په بازار کې د افغانیو تقاضا او عرضه په منظمه توګه تنظیم کړي، ترڅو د نورو اسعارو په وړاندې د افغانۍ ثبات وساتل شي.

د افغانۍ د ارزښت لوړېدل د کورني اقتصادي ثبات لپاره یو مثبت ګام دی، ځکه چې د ملي پیسو تقویه کول کولی شي وارداتي لګښتونه راکم کړي، کورنۍ بیې ټیکاو ته نږدې کړي او د خلکو پیرود ځواک زیات کړي. د دې ترڅنګ، د افغانۍ د ثبات پایښت نړیوالو پانګوالو او سوداګرو ته د باور فضا برابروي، چې په اوږدمهال کې د اقتصادي ودې لپاره اساسي ارزښت لري.

د افغانۍ د ارزښت لوړېدل د افغانستان د اقتصاد لپاره د مثبتو پایلو یو ګام ګڼل کېږي، خو د دې ثبات ساتنه اوږدمهاله او منظمې تګلارې ته اړتیا لري. افغانستان بانک ته په کار ده چې د پولي سیاستونو په پلي کولو کې خپل تمرکز ته دوام ورکړي او د ملي پیسو د ثبات او اقتصادي ودې لپاره هڅې پراخې کړي.